വെടിവെപ്പിന് അനുമതി നിഷേധിച്ചത് നന്നായി; പള്ളി പൊളിച്ചതുകൊണ്ടാണ് ഇപ്പോള്‍ രാമക്ഷേത്രം നിര്‍മിക്കാന്‍ കഴിഞ്ഞത്: വിവാദ പ്രസ്താവനയുമായി കല്യാണ്‍സിംഗ്

ന്യൂദല്‍ഹി: ബാബരി മസ്ജിദ് വിഷയത്തില്‍ പുതിയ വെളിപ്പെടുത്തലുമായി ഉത്തര്‍പ്രദേശ് മുന്‍മുഖ്യമന്ത്രി കല്യാണ്‍സിംഗ്. പള്ളി തകര്‍ത്തതു കൊണ്ടാണ് ഇപ്പോള്‍ ക്ഷേത്രം നിര്‍മ്മിക്കാന്‍ കഴിഞ്ഞതെന്നാണ് വിവാദ പ്രസ്താവന.

ബാബരി മസ്ജിദ് പൊളിക്കാന്‍ കൂടിയ കര്‍സേവര്‍ക്കെതിരെ മജിസ്‌ട്രേറ്റ് വെടിവെപ്പിന് ഉത്തരവിട്ടിരുന്നു. എന്നാല്‍ താന്‍ അതിന് തയ്യാറായില്ലെന്നും ഉത്തരവ് നല്‍കാനുള്ള അപേക്ഷ തള്ളിക്കളഞ്ഞെന്നും കല്യാണ്‍സിംഗ് വ്യക്തമാക്കി.

മസ്ജിദ് പൊളിക്കാന്‍ ഒത്തുകൂടിയ മൂന്നരലക്ഷം കര്‍സേവര്‍ക്കെതിരെ വെടിവെപ്പ് നടത്തുന്നത് നിരവധി പേരുടെ ജീവനെടുക്കും. രാജ്യത്ത് അതിന്റെ പേരില്‍ ധാരാളം പ്രശ്‌നങ്ങളുണ്ടാകാനും സാധ്യതയുണ്ട്. അതിനാലാണ് ഉത്തരവ് തള്ളിയത്.

അതേസമയം പള്ളി പൊളിച്ച സംഭവത്തെയും കല്യാണ്‍സിംഗ് ന്യായികരിക്കുന്നുണ്ട്. അന്ന് എടുത്ത തീരുമാനത്തില്‍ തനിക്ക് അഭിമാനമുണ്ടെന്ന് കല്യാണ്‍ സിംഗ് ഹിന്ദുസ്ഥാന്‍ ടൈംസിനോട് പറഞ്ഞു.

രാമക്ഷേത്രത്തിലെ ഭൂമിപൂജയെ അനുകൂലിക്കാത്തവരാണ് പ്രതിപക്ഷം. അതിനാല്‍ അവരെ ചടങ്ങിലേക്ക് ക്ഷണിക്കേണ്ടതില്ലെന്നും അദ്ദേഹം പറഞ്ഞു. ക്ഷേത്രം നിര്‍മ്മിക്കുന്നതോടെ അയോധ്യ ഇന്ത്യയിലെ തന്നെ ഏറ്റവും പ്രശസ്തമായ ടൂറിസ്റ്റ് കേന്ദ്രങ്ങളില്‍ ഒന്നായി മാറുമെന്നും നിരവധി പേര്‍ക്ക് ജോലി ലഭിക്കുമെന്നും കല്യാണ്‍സിംഗ് പറയുന്നു.